Ultime News
Palmi – La Varia Meccanica di Memma Bagalà

Palmi – La Varia Meccanica di Memma Bagalà

Lu vintisetti Agustu
s’avi e teniri a mmenti
Parmi eppi lu postu
tra chiddhi cchiù mponenti.
Di tutti li rribbati
paisani e furesteri
guardavanu stonati
isandu li banderi
Chi sorta di spettaculu!
Chi festa strabilianti
fu comu nu miraculu
daveru emozionanti.
Lu sindacu mbitau
la genti altu locata
e quandu iddha scasau
rrestau traseculata.
Parraru li giornali
li riti trasmittenti
a titulu mondiali
la vittaru la genti.
Piccatu ca me nonnu
Non esti cca prisenti
mi vidi ca so Varia
smoviu li cuntinenti.
Fu grandi la pensata
chi eppi nta la menti
pecchi la “gran scalata”
uniu tanta genti.
Passaru già centanni
non c’è chi diri è vero,
sta festa di la Varia
e comu nu misteru.
Cu garbu arrinesciu
ma faci caminari
li cosi poi moviu
facenduli girari

Me nonnu, chi grand’omu,
chi “geniu”, chi “talentu”
scrivitinci lu nomu
supa nu monumentu.
Amici Parmisani
tenitivillu ‘mmenti
aviti nta li mani
ricchizza assai valenti.
Pecchì iddhu spendiu
“Meduddha” e forti spisi
nu beni vozzi dassari
a tuttu lu paisi.
Sulu pe numinata
lu potti canusciri
però sugnu priata
di lu so gran sapiri.
A st’omu di gran menti
lu portu nta lu pettu
jeu sugnu so niputi
parrandu cu rispettu.
Fra l’omani ‘mportanti
chi Parmi onurau
lu nomu Militanu
sempri lu trascurau.
jeu sugnu assai sdignusa
di chistu modu i fari
trovati ora la scusa
curriti a li ripari.
Evviva, addunca evviva,
lu ngegnu parmisanu
evviva sempri Parmi
e Peppi Militanu.

Tratto da: Palmi, la Varia Meccanica – Memma Bagalà – Luglio 2003
In copertina: Varia 1965 – Animella: C. Parrello, Padreterno: A. Brunetta

Articolo curato da:

Rocco Balzama

Ethical & Growth Hacker | Blogger | Developer | Graphic & Web Designer | Consulent IT | Copywriter | SEO Specialist | CEH Certified

Articoli correlati